Job 12

Mĩario ya Ayubu

1 Ningĩ Ayubu agĩcookia atĩrĩ:

2 ^a“Hatirĩ nganja inyuĩ nĩ inyuĩ andũ,
naguo ũũgĩ ũgaathiranĩra na inyuĩ rĩrĩa mũgaakua!
3 ^bNo rĩrĩ, ndĩ na ũmenyo o ta inyuĩ;
mũtirĩ oogĩ kũngĩra.
Nũũ ũtooĩ maũndũ macio mothe?

4 ^c“Nduĩkĩte mũndũ wa gũthekererwo nĩ arata akwa,
o na gũtuĩka nĩndakaĩire Ngai nake akĩnjigua:
niĩ nduĩkĩte mũndũ wa gũthekererwo,
o na gũtuĩka ndĩ mũthingu na ndirĩ ũcuuke!
5 ^dAndũ arĩa maikaraga megangarĩte manyũrũragia mũtino,
makona ta ũndũ ũcio ũkoraga o andũ arĩa magũrũ mao matenderũkaga.
6 ^eHema cia atunyani nĩcio ciikaraga igaacĩire,
na andũ arĩa marakaragia Mũrungu nĩo maikaraga na thayũ,
o acio makuuaga ngai yao na moko.

7 ^f“No ta kĩũrie nyamũ, na nĩigũkũruta ũhoro,
kana ũrie nyoni cia rĩera-inĩ, na nĩigũkwĩra;
8 kana warĩrie thĩ, na nĩĩgũkũruta ũhoro,
kana ũkĩarĩrie thamaki cia iria-inĩ, nacio nĩigũkũhe ũhoro.
9 Nĩ irĩkũ cia icio ciothe itooĩ
atĩ nĩ guoko kwa Jehova gwĩkĩte ũndũ ũyũ?
10 ^gMĩoyo ya ciũmbe ciothe ĩrĩ guoko-inĩ gwake,
o na mĩhũmũ ya andũ othe.
11 Githĩ gũtũ gũtithuuranagia ciugo
o ta ũrĩa rũrĩmĩ rũcamaga irio?
12 ^hGithĩ ũũgĩ ndũkoragwo na andũ arĩa akũrũ?
Githĩ gũtũũra mũno gũtirehaga ũmenyo?

13 ⁱ“Ũũgĩ na hinya nĩ cia Ngai;
mataaro na ũmenyo nĩ ciake.
14 ^jKĩrĩa amomoraga gĩtingĩakwo rĩngĩ;
mũndũ ũrĩa aahingĩra njeera gũtirĩ mũndũ ũngĩmuohora.
15 Ahingagĩrĩria maaĩ, gũkaaga mbura;
ningĩ aamarekereria makaananga bũrũri.
16 ^kHinya na ũtooria nĩ ciake;
mũheenio na mũheenania eerĩ no ake.
17 Aheani kĩrĩra amatongoragia matarĩ nguo,
na agatua aciirithania irimũ.
18 ^lNĩohoraga mĩnyororo ĩrĩa athamaki moohaga andũ nayo,
akamooha mũcibi njohero. ^{▼▼Nguo cia kuohera njohero ihumbĩre thoni no cio ngombo cietĩkĩrĩtio kwĩhumba.}
19 ⁿAthĩnjĩri-Ngai amatongoragia marutĩtwo nguo,
na akangʼaũrania andũ arĩa mehaandire tene.
20 Nĩakiragia mĩromo ya aheani kĩrĩra arĩa meehoketwo,
nao athuuri akamatunya ũhoro wa gũkũũrana maũndũ.
21 ^oWe nĩagagĩra arĩa atĩĩku bata,
nao arĩa marĩ na hinya nĩamatunyaga indo ciao cia mbaara.
22 ^pNĩaguũragia maũndũ marĩa mariku ma nduma,
na nduma nene ya gĩkuũ akamiumĩria ũtheri-inĩ.
23 ^qAnenehagia ndũrĩrĩ, agacooka agaciananga;
aingĩhagia ndũrĩrĩ, agacooka agacihurunja.
24 Nĩagaagagia meciiria ma atongoria a gũkũ thĩ;
akamaingata, morũũrage werũ-inĩ mũtheri ũtarĩ njĩra.
25 ^rMahambaataga nduma-inĩ kũrĩa gũtarĩ ũtheri;
ningĩ atũmaga matũgũũge ta mũndũ mũrĩĩu.